النقاب غير اسلامي

الحرية لها حدود، كلام قيل في أزمة الرسوم الدنماركية، ويصلح للقول خلال الأزمة الحالية، ارتداء النقاب ليس حرية بل هو تعدي على المجتمع كله، لان من ترتدي النقاب تبرر وتشرع وسيلة ممتازة للسرقة والغش والتحرش والهروب الخ.. الحرية لها حدود، مش مفروض يبقى في منقبات ولا عرايا، لان في كلا الحالتين في ضرر ع المجتمع، ممكن ناس تقول أننا أحرار نمشي عرايا، بس الحرية لها حدود، مينفعش.

ليه ربنا خلقنا كل واحد ليه ملامح تميزه عن الأخر، ليه اتخلقنا كل واحد بوجه مختلف عن الأخر، دي نعمة المفروض نقدرها، لو كلنا شكل واحد كان القاتل لا يحاسب، هتحاسب مين؟، كان السارق هيهرب بسريقته، مين اللي سرق؟ كان الغش اتنشر، اللي مش مذاكرة اختها تروح الامتحان بدلها.... ليه تحريم نعمة ربنا؟

ليه في تعبيرات مختلفة للوجه الواحد، ليه وانا سعيد شكلي مختلف عن وانا حزين، وانا خائف وجهي مختلف عن وانا متحمس، ايه حكمة ربنا من ده؟

ليه بنحرم الوجه؟

ليه بنعتبر المرأة عيب؟ لو عايزين نتقدم ويكون لينا قيمة ف العالم ده، يجب ان نعامل بعضنا باحترام اكثر، يجب ان ينخفض مستوى الكره في قلوبنا، والظلم في تعاملنا، المرأة ظلت مظلومة لفترة طويلة في المجتمع ده، مظلومة من الرجال وبعض النساء انفسهم، من يصيحون في الاعلام الان دفاعا عن نقاب انا مؤمن مئه بالمئه انه حرام.

البلد فيها مصائب كتيير وقضايا اكبر من قضية النقاب، حين يحلل الله شيئ، ده مش عشان نزايد عليه، النقاب مش مذكور في اي نص اسلامي، النقاب ليس اسلامي، النقاب تشريع للجريمة. وتمكين للمجرم. كفاية.