السبت، مارس 24، 2007

بائعو الدين

رحت المحاضره بدري زي العاده لأن بالذات المحاضره دي المدرج بيتملي بسرعه، وزي العاده برده طلع بتوع الأخوان يستغلوا عدد الحضور الكبير قبل ميعاد الدكتور، ويكتبوا حديث ويشرحوه واللي يسمع يسمع واللي مايسمعش مايسمعش، والناس بتتكلم عادي، مافيش مشكله لحد كده.

التطور الجديد والخطير اللي أزعجني جدا، ان بعد ما شرح الحديث خلص، الدكتور كان لسه ماوصلش، فالطلبه الاخوانيون
اعدو يتشوروا مابينهم بصوت مش مسموع، وبعدين طلع طالب منهم على الونج الشمال من المدرج، وطالب على الونج اليمين كان قريب مني، وطالب ورا، وطبعا لسه في واحد مكان الدكتور، وطبعا الناس بتتكلم عادي وفي لسه دوشه، وفجأه مسك الطالب اللي واقف مكان الدكتور مصحف وبدء يقراء قرآن بصوت عالي، وحط الطلاب المنتشرين في المدرج ايديهم
حولين بوقهم وبدأو يرددوا "ششششششششششششششش"، "ششششششششششششششششش".

المهم ان الدكتور جه ساعتها ونزلهم علشان يبداء يشتغل، بس انا فوجئت ان الدين وصل للدرجه دي، للدرجه اللي العبد يقراء القرآن مش علشان يتقرب من ربنا، بل علشان يفرض سلطه لنفسه على الناس التانيه، والقرآن لم ينزل ليفرض على الناس بالعافيه، أي واحد في أي مكان يطلع مصحف ويقراء بصوت عالي يسكت الناس!!، ده يدل على انه لا يقراء لله، ده تقليل لقيمة القرآن، القرآن يقراء على من يذهب لسماعه، القرآن أكبر من اننا نكتف اللي هيسمعوه، وبعد كده ممكن واحد مضايق من اللي بيقراء في سورة البقره مثلا، يقوم واحد صاحبه ي"شششششششششش" قصاد التانيين ويبداء هو يقراء سورة الأحزاب أو أي سورة تانيه، ده مش إسلام ده تطاول على الإسلام، وتقليل لمكانة الدين ومكانة القرآن.